#السياحة-الداخلية
#casablanca2
لي باغي يجي لمدينة الدارالبيضاء سواء للسياحة أو سفر عمل خذ هاد النصائح مني تقدر تنفعك
الى مكتعرف حتا شي واحد فكازا و بغيتي تجي تاخد أوطيل فين تبات... ملي تنزل من التران و تخرج قدام محطة القطار متمشيش تجري تاخد طاكسي أحمر من قدام المحطة بعد واحد 50 متر عاد شوف طاكسي و حتى لا نسيتي و خذيتيه واياك تقوليه خاصني أوطيل راه أي أوطيل غادي يديك ليه بلاما تحس غادين يزيدو عليك 150 درهم غير ديال مول الطاكسي و هاد الشي أنت مكتشوفوش هههه حتى كتطلع لبيتك عاد كيرجع مول طاكسي ياخذ " الجعبة " ديالو ههه
بالنسبة للفنادق الغير المصنفة أو الفنادق الصالحة فقط للمبيت كيتواجدو بمنطقة " مرس السلطان و بن جدية " .. ثمن الغرفة لشخص واحد كيبدا من 150 درهم و كيوصل حتال 250 درهم .. قبل ما تخلص فلوس الشومبر طلع تأكد واش كاين الما السخون .. السيفون خدام .. كاينة فوطة و كاين الصابون .. و الفراش نقي مفيهش الوسخ ولا الزغب .. ملي ترتاح نعام أسيدي نزل و خود معاك شوية الفلوس باش دور .. الى وصلت العشية ضرب ليك دويرة فالبرانس و مرس السلطان شوف المتاجر و الديور لي مزال محافظة على التصميم ديال المستعمر الفرنسي و خود ليك قهيوة الثمن مكيتعداش 15 درهم كأبعد تقدير .. و من بعد أسيدي رجع لمرس السلطان حدا سبع شوانط عند الفاسي خود الدجاج محمر على حقو و طريقو غير ب 25 درهم و من بعد خود الطرامواي ولا التران ديال التريسينتي هههه اتجاه عين الذئاب الشاطئ .. الدراهم للرحلة .. فاش توصل عندك 2 خيارات الى مشيتي على ليمن كاين عين الذئاب لاكورنيش و هنا أسيدي كاين ما يتشاف و كنصحك دور على ليمن و حتا لا بغيتي دور على ليسر كاين أسيدي عين الذئاب الشاطئ تمشى يشربك البرد شوية حتى توصل لأكبر مول تجاري فأفريقيا " موروكو مول " هنا كاين مقاهي و مطاعم و متاجر لماركات عالمية مشهورة الى بغيتي تشري شي حاجة ما عليك غير تختار ما بين هاد 2 أرقام يا 50 درهم يا 5000 درهم .. يا تشري شوميزة من LC Waikiki ب 50 درهم يا تشري شوميزة من GUCCI ب 5000 درهم ههه من بعد مت تسقي عينيك أخي المواطن كنصحك تمشي تشوف واحد الأكواريوم ديال الحوت منظر زوين و من بعد شير ل Fnac خود ليك شي كتاب راه مرة مرة كايكونو دايرين تخفيضات .. ملي تسالي غادي تجي من نفس الطريق لي جيتي منها غير ما تنساش المول كيسد مع 9 و الطرامواي 11 اخر واحد كيتحرك .. ملي ترجع ضربها بشي نعسة و فيق فالصباح مع 8 و سير فطر فالأوطيل فطور فااابووور هههه من بعد غادي تنزل لحدا بنك المغرب و لا العمالة ولا ساحة الحمام لي قريب يحيدوها و أنت نازل شوف المعمار الكزاوي شحال زوين و الناس شحال زوينين و لي سولتيه يوريك الطريق نيشان و أنت نازل دوز على ساحة الأمم المتحدة و الكرة الأرضية و شوف باب مراكش لي مزال كيشهد على قدم مدينة أنفا سابقا و متدخلش مع باب مراكش نزل نيشان على ليمن حتى توصل لميناء الدارالبيضاء .. شوف على ليسر ديالك غاتلقى قهوة شعبية كراساها زرقين من العود قوليه يصيب ليك مقيلة كروفيط ضروري تعجبك و فاش تسالي بصحتك تمشى وسط من الحواتة و شوف بيضاوة كيف دايرين و لوح عينيك شوف الفلوكات و لا قدرتي جبد تيليفونك صور بصحتك .. فاش تسالي عزيزي جا وقت تاخد قهيوة فالصقالة و ممكن تجيك غالية شوية ماشي مشكل من تمى دخل للمدينة القديمة شوف كازا ديال بصاح تمى زال الناس نيا و كيف توصل للجيهة لي طروطوار فيها ممصبوغش و الطوارو دزبل خانزين رجع من الطريق لي جيتي منها حتا توصل للصقالة و رجع لباب مراكش دخل شوف المنطقة التجارية ديال المدينة القديمة و حاول تبقى فالبلايص العامرين حقاش لا فرزوك بوحد ما نتا فخير .. كاين واحد العناصر لي كيدويو ب تشاشششاااا مكيهموش شكون أنت ومنين جيتي كيهمو غير التيليفون لي فجيبك و رزقك يديه ليك .. المهم نرجعو فين كنا ضرب دويرة فباب مراكش و ملي تسالي خرج أسيدي و سول على شارع أنفا كيف توصل للبداية ديالو متمشيش معاه سير معا الشارع لي على اليمين ديالو حتا توصل للاميزون ديال رونو ودور على ليسر و بقا غادي نيشان غادي تلقى قبالتك صومعة مسجد الحسن الثاني و م المنظر ديالها كنتحدا أي مدينة في المغرب معندهمش بحالو ههه غير ضاحكين .. مسجد الحسن الثاني منحتاجش نوصفو ليك خليك تكتاشفو راسك و الى كانت هاديك أول مرة غادي تشوفو كون أكيد غايعجبك و ماغاتسخاش منو ....
------------------------------------------------
دويت ليكم على أماكن للزيارة فالدارالبيضاء ، أجي دابا ندويو على التسوق بأثمنة مناسبة و لا غير تشوف الأسواق المهم فبلاصتما دير الشوبينغ بالفلوس دير غير الشوفينغ بعينيك .. بطبيعة الحال أنت غتكون في المدينة ولا ساحة الماريشال و لا الكرة الأرضية بالتحديد هي نقطة البداية ، قدامك غادي تلقى باب مراكش فالطريق ليه حدا أوطيا حياة ريجينسي غاتلقى صحاب لي كارط سيم و من بعد غيوقفوك صحة واحد التيتيزات مقادين الحالة لا شفتيهم غادي تفشل ولكن عنداك دوب ليهم رله كيعتامدو على اللسان باش يديرو ليك التنويم المغناطيسي المهم هاد الدريات كتقوليك غنعطيوك هاد الشيتة فابور و هاد الجيل فابور و هاد الشمبوان فابور و و و و لكن غتشري دونتيفريس مبيض للأسنان ب 150 درهم أو قالب من حجم 150 سم المهم أهرب أهرب و لا تستسلم لهم من بعد فباب مراكش غادي تلقى الإفريقيات كيقدمو خدمة الحناء البيرسينغ..... المهم حاول متجاوبهمش لا جوبتيهم مغيطلقوكش حتى تخلص.... المهم من بعد غادي دخل غاتلقى الفراشة كيبيعو الأثارات الفرعونية المداحة و التصاور ديال كازا قديما..... المهم سوق عادي فيه الحوايج أثمنة ما بين المتوسطة و المرتفعة المهم باب مراكش صغير تقدر فساعة دورو كامل من بعد خرج معا الباب و رجع منين جيتي و تبع السكة ديال الطرام في اتجاه ساحة الحمام حتا توصل لحدا إنوي و اتصالات و شوف على ليسر ديالك غتلقى تما بلاكة ديال الطوبيس بعد منها شوية ووقف و شد يديك دير بحالا غادي تضرب شي واحد بالبونية و بقا تنزل يدك و طلع هاكداك راه كتقوليهم " كراج علال ههه ، المهم كيف تركب قوليه يحطك حدا الحبوس ، متنساش الثمن 6 دراهم .. كيف توصل غاتلقى واحد القصر على ليمن ديالك سير نيشان غتلقى واحد الحي إسمه " الأحباس " كان قديما سجن المهم هاداك هو الحي الوحيد فالبيضاء لي مزال محافظ على التراث المعماري القديم ، المهم خود راحتك تما غير بقا فالبلاصة ديال الحوانت ، غاتلقى المسجد القديم راه الصومعة ديالو باينة دور حداه من بعد كنصحك تشوف سوق الزيتون شري 5 دراهم مخلطة دوق مع راسك و كنتمنى تصادف الزيارة ديالك لسوق الزرابي يوم الجمعة مع 14:00 كيكون سوق الدلالة ، جو جميل و حوارات و البراح كيبرح.... المهم سوق الأحباس فيه الفوقيات و الجابادورات بأثمنة جيدة غير تاوا و كون عصبة فالتشاطير .. المهم كيف تسالي رجاع منين جيتي حتى توصل لفين حطكك الطاكسي ، دابا غتكمل الطريق للقدام كاينة قنطرة سكة التران كيف تفوتها على ليمن كاين سوق القطاني و الحبوب متفوتش الفرصة دخل شوف دوي مع البياعة و الشراية راه الناس فكازا بسطاء و مطلوقين ماشي بالشرط تشري من عندو المهم خلق حوار و متكترش بزاف الهدرة فاش تسالي خرج لكي لا أنسى الشارع لي واقف فيه أنت دابا راه أطول شارع فالمغرب سميتو شارع " محمد السادس " أو " طريق مديونة " ، المهم مرحبا بك فمدينة درب السطان ههه الى مشيتي مع داك الشارع كولو قيساريات و محالاتز الملابس و الأكسسوارات النسائية و أيضا الألبسة التقليدية الرجالية..... نصيحة لا باغي دخل تقدى مرحبا غير كون حريص على تكون لابس شي حاجة فيها الجيوب الداخل خشي بزطام و التيليفون تما و لبس سروال الدجين و خليه خاوي باش ميطمع فيك حد لأن لاطراس ديال التيليفون مكيبانش فالجيوبة ديال سروالك هاكاك الشفارة غايبعدو عليك ، المهم راك فحي شعبي عادي جدا غتلقى المضاربات و تسمع كلام خايب و البوليس.... عادي حاول تأقلم غير لا وقفك شي حد سواء رجل أو امرأة متوقفش راه ممكن يكونو صحاب السماوي .. فاش تشري آش باغي خرج و بغادي نيشان تتوصل لقيسارية " أخماسي " هادي خاصة بالأكسسوارات و الإلكطرونيك المهم أي حاجة تما راه شينوة يعني لا قالو ليك دوريجين أهرب أهرب و غالبا الثمن كيكون رخيص بزاف ، من الأحسن شري كادر ديال النظاظر و لا بوشيط للتيليفون .. المهم تسالي اخرج كاين تما مول العصير خود ليك شي عصير و لا زيد القدام كاين كيوسك كيبيع البيني لذيذ و بنين و لا بريوات .. كول بصحتك كازا الماكلة فيها رخيصة الحمد لله و حتى لا معندكش كون أكيد غتاكل ، الدارالبيضاء ماليها بساط و زوينين غير السمعة ديالها خصروها المشرملين و صحاب تشااااا تشييي .. المهم زيد القدام غتلقى سطاسيون ديال " أفريقيا " و داك الشارع لي قدامها سميتو الفداء على ليمن حوالي 200 متر كاين " قواس الساحة " هاد البلاصة لا تنام كاين مقاهي و مطاعم 24/24 ساعة ، المهم خليك فشارع محمد السادس و بقا غادي نيشان كاينا طلعة ما فيها باس تصبر هههه غتبقا غادي تتوصل لسوق العيوو هاد السوق فيه جميع أنواع الطيور من طيور زينة حمام بيروكي البيروش سطيلة...... أنواع لا تحصى من الطيور للبيع و أيضا دجاج الزينة و الأسماك و القطط الكلاب........ المهم غادي يعجبك الجو تما 100% سوق صغير ديال الحيوانات و لكن زوين فاش تعيا أجي نعطيك برنامج للغداء لي ولاد كازا بزاف معارفينوش ، فسوق العيون كاين سوق الخضر و الأسماك ، غاتشري 2 ماطيشات 2 فلفلات و شي دنجالة صغيرة من بعد سير عند الحواتة خود شي 50 درهم حوت مخلطة و قوليه باغي نقليها هنا باش يصيبو ليك تما.... المهم تسالي غتلقى واحد الحوينيت كيقليو فيه كتعطيه الحوت يقليه و غيعطيك موس و صوبيرة و الماء ، نقي 2 ماطيشات لشلاظة و الفلفلة خليها هي و الدنجال يتقلاو مع الحوت و دير شلاظة فطبسيل راه كلشي تما ، و فاللخر جلس فالطابلة و كول حتى تشبع عاد غدي معاك المشاش لي تما ، لا مشيتي حتى عطيتيهم من الأول غتلقاهوم كيتخاطفو معاك فوق الطابلة ههه .. المهم بالصحة و الراحة دابا خرج من سوق العيون و فوقو كاين سوق الفحم بالجملة دخل معاه حتال الآخر ديالو كاين باب كيخرجك لسوق فيه غير المشرملين ، ما دوي مع حتى واحد ، زرب المشية مزيان حتى تلقى قدامك سوق الحديد و تحتو سوق بياس الماطر و أحسن حريفية فالميكانيك ضرب دويرة تم و من بعد غتلقا مالين العود و شوف الدنيا كيف دايرة بقا غادي و سول على سوق الخرازة ، هاد السوق فيه حوايج الولاد و أيضا الأحذية من جميع الأنواع جديدة و مستعملة ، و أثمنة جد مناسبة ، فاش تسالي من تم سول على مالين الكتوبة ، كاين واحد 3 المحالات ، شري شي حاجة و لا غير زورهم المهم فاش تسالي قدامهم غتلقا البال هههه غاتلقا هنا جميع الفتيات كايديرو الشوبينغ و بالخصوص يوم السبت صباحا كيتحلو الكوليات الجداد و حتى الدراري أيضا كل سبت صباح ، من بعد على يمينك كاين محالات كيبيعو الكلاص و السبور ، المدرح و الدوريجين المهم ضرب ضويرة و خود ليك شي كاس دياس عصير قصب السكر و لا الليمون أما عصير الرمان منصحكش تشربو على الجوع و تما سول على مالين البونج راه كاين واحد كايبيع الطون فكروسة غتلقى عليه الزحام خود ليك شي نص بالفرماج ، فاش تسالي سول شي محال ولا كارديان على " مرجان درب السلطان " في الطريق زرب المشية و غتلقى سوق البيكالات و سوق الذبان بلاما توقف غير كمل هنا الشفارة أكثر من البياعة و الشراية .. فاش توصل قدام مرجان وقف فشارع محمد السادس و شد يدك تاني و وقف صبعك بحالا غتشهد و نزلو على ليمن هاكا راك كتقول للطاكسي ديني للمدينة ، كيف تركب خلص 6 دراهم و قوليه يحطك حدا درب عمر ، سوق درب عمر هو سوق الشينوة وهو المزود لجميع الأسواق فكازا و فالمغرب غتلقى فيه شناوة بزاف ، تسارا و دور مع راسك و راه الأثمنة مناسبة و خصوصا لا غتشري بالجملة .. فاش تسالي غاتسول على شارع رحال المسكيني .. غاتبقا غادي غادي غادي حتى توصل لسبع شوانط لي فيهم مول الدجاج الفاسي لي وصيتك تاكل عندو ههه ، سير هاد المرة و خود ليك سدر الدجاج باش تصحاح و فاش تسالي بصحتك غسل يدك و رجع لسبع شوانط .. سول على Alpha55 راه غير تما مركز تجاري صغير ضرب فيه ضويرة و هضم الدجاج و فاش تنزل منو كمل علي ليمن حتى توصل للسكة ديال الطرامواي و بقا نازل شوف النافوة و ضواو العمالة باليل و الناس ضاحكة و متنساش تبقى تابع السكة حتا توصل لشارع محمد الخامس هاد الشارع باليل كيعكون مظر ديالو جميل بزاف خود ليك شي نص نص كبيرة و ريح فشي قهوة تما و سرح عينيك شوف سكان البيضاء الكبيرو فيها السود و البيض فيها جميغ الجنسيات و عروبية صحراوة شلوح جبالة كلشي فيها عايشين مع بعضياتهم .. هادي هي كازا الأم ديال كلشي و حاضنة كلشي..... المهم عزيزي تسالي رجع تنعس .
للإشارة فقط راك يلاه شفتي 10% ديال كازا لحد الآن .. الدارالبيضاء مدينة كبيرة لدرجة كنستعملو الطريق السيار باش نمشيو من حي لحي آخر و للإشارة فقط باش تمشي بالسيارة من شمال البيضاء " 17 " حتال للجنوب ديالها " طماريس " خاصك على الأقل 4 ساعات بدون استعمال الطريق السيار
----------------------------------------------
